miðvikudagur, október 12, 2005 :::
 
Hæ,
Ég verð að fjalla lítillega um dapurleg örlög Hannesar Hólmsteins, sem neyddist til að selja húsið sitt til að eiga tólf milljónir króna fyrir sektargreiðslu til Jóns Ól, sem aftur á móti er ofurseldur þeim örlögum að hafa alla ævi hefur legið undir því ámæli að hafa auðgast á dópsölu. Það aldrei verið sannað, heldur verið flokkað undir almannaróm, sem sagt er að sjaldan ljúgi. Nú eru ábyggilega um 30 ár síðan JónÓ var bendlaður við dópsölu og ekkert hefur sannast á hann allan þennan tíma, svo ég get ekki annað en dregið þá ályktun að auður hans komi úr öðrum uppsprettum en viðskiptum með eiturlyf. Hafi hann upphaflega hagnast um einhverja upphæð á dópsölu hefur honum tekist að ávaxta þá peninga gríðarlega vel og margsýnt og sannað að hann er gæddur afburðagóðu viðskipta-og peningaviti. JÓl hefur t.d. vit á því að siga breskum lögmönnum sínum á Hannes þar sem hann veit að meiðyrðalöggjöf í Bretlandi þar sem viðurlög eru þung og harkaleg og krafist hárra bóta fyrir ærumeiðandi ummæli, ekki eins og á Íslandi, þar sem allir geta látið allt flakka og svo eru ummælin dæmd dauð og ómerk og í besta máta fylgir sektargreiðsla upp á hundrað þúsund kall, sem hver þvottakona getur greitt eins og ekkert sé. Ég hefði bara farið í Héraðsdóm hefði ég ætlað að fá Hannes dæmdan fyrir meiðyrði og það sér hver maður hvað ég hefði haft upp úr krafsinu.
Hannes var svo ótrúlega heppinn að Kjartan keypti af honum húsið umsvifalaust fyrir 30 milljónir, en af góðmennsku sinni leyfir hann Hannesi að búa í húsinu og halda áfram að leigja nemendum við Háskóla Íslands herbergi fyrir okurverð á þessum hentuga stað við Hringbrautina. Þrátt fyrir að Hannes hafi algerlega grunlaus lapið upp gamlar og óstaðfestar sögusagnir á opinberum vettvangi og síðan látið ummælin um dópsölu JÓl standa á heimasíðu sinni dágóðan tíma, ekki sinnt símtölum frá breskum lögmönnum og látið alla viðleitni af hálfu JÓl og hans lögfræðinga til sátta og friðarumleitana sem vind um eyru þjóta, get ég ekki annað en dauðkennt í brjósti um hann. Samt finnst mér þetta í aðra röndina bara svolítið gott á hann.
Svona geta vorkunnsemi og kvikindisháttur háð harða hildi í huga manns og sálu.
Það er annað sem upp úr stendur eftir fréttir síðustu daga. Að manni skuli aldrei hafa dottið í hug að leita til þeirra Kjartans og Styrmis gegnum tíðina með erfiðleika sína og áföll. Samkvæmt upplýsingum vina þeirra og bandamanna eru þar á ferð menn sem mega ekkert aumt sjá og veita öllum úrlausn og aðstoð, nokkurs konar ímynd Hróa hattar dagsins í dag í stöðugum bardaga við Fógetann í Nottingham. Það mætti samt segja mér að þeir hefðu ekki fallið fyrir eymd vinstri sinnaðs kerlingaraumingja, ekki treyst því að hún setti kross við flokkinn þeirra í kjörklefanum og vísað henni kurteislega út um bakdyrnar.
Kveðja,
Bekka

::: posted by Bergthora at 11:21 f.h.